واشنگٹن : امریکا میں تیسری کورونا ویکسین کی منظوری

واشنگٹن ( انٹرنیشنل ہیلتھ ڈیسک ) امریکا کی فوڈ اینڈ ڈرگ ایڈمنسٹریشن اتھارٹی نے فائزر اور میڈورنا کے بعد جانسن اینڈ جانسن کی تیار کردہ کورونا ویکسین کے استعمال کی بھی منظوری دے دی۔ عالمی خبر رساں ادارے کے مطابق امریکی دوا ساز کمپنی ‘جانسن اینڈ جانسن’ کی تیار کردہ کورونا ویکسین کی منظوری دیدی گئی ہے۔ اس سے قبل امریکی  فوڈ اینڈ ڈرگ کے ادارے نے ‘فائزر’ اور ‘موڈرنا’ کی کورونا ویکسنز کی بھی منظوری دی تھی۔ اس وقت دنیا بھر میں چین، امریکا، روس اور برطانیہ کی تیار کردہ 5 سے زائد ویکسنز لگائی جارہی ہیں تاہم ان سب پر جانسن اینڈ جانسن کی ویکسین کو اس لحاظ سے فوقیت حاصل ہے کہ جانسن اینڈ جانسن کی ویکسین صرف ایک ٹیکے پر مشتمل ہے۔ دیگر کورونا ویکسین کے برعکس جانسن اینڈ جانسن کی تیار کردہ کورونا ویکسین کی صرف ایک ٹیکہ ہونے کی وجہ سے ویکسی نیشن میں آسانی ہوگی اور اسی وجہ سے اکثر ممالک جانسن اینڈ جانسن کی ویکسین کو اہمیت دے رہے ہیں۔ امریکی دوا ساز کمپنی جانسن اینڈ جانسن کی کورونا ویکسین کے ٹرائل 3 براعظموں میں کیے گئے، ٹرائل کے دوران ویکسین لوگوں کو اسپتال میں داخلے سے بچانے، شدید بیمار ہونے اور وائرس سے ہلاکت کے خلاف 85 فی صد تک موؐثر پایا گیا۔ جانسن اینڈ جانسن کی جانب سے جاری بیان میں کہا گیا ہے کہ ویکسین ان ممالک میں بھی کار آمد ثابت ہوئی ہے جہاں جنوبی افریقا میں سامنے آنے والی کورونا کی نئی شکل تیزی سے پھیل رہی ہے۔ جانسن اینڈ جانسن نے آئندہ ماہ کے اختتام تک امریکا کو ویکسین کی دو کروڑ خوراک مہیا کرنے کی امید ظاہر کی ہے جب کہ موسمِ گرما تک 10 کروڑ ٹیکے دستیاب ہوں گے۔ جانسن اینڈ جانسن نے عالمی ادارہٗ صحت اور یورپی ممالک سے بھی ویکسین کی منظوری کے لیے رجوع کرنے کا عندیہ دیا ہے۔

اس خبر پر اپنی رائے کا اظہار کریں

اپنا تبصرہ بھیجیں