کراچی : بریسٹ کینسر سے آگاہی، بروقت تشخیص اور علاج کے لیے ایپ متعارف

 کراچی ( ہیلتھ رپورٹر ) پنک پاکستان کی جانب سے بریسٹ کینسر جیسے موذی مرض سے آگاہی کے لیے ایک ایپ متعارف کرائی گئی ہے جس میں مرض سے متعلق اہم معلومات، ماہرین کا پینل اور مفت علاج کی سہولت موجود ہے۔ خواتین میں بریسٹ کینسر جیسے موذی مرض کی بروقت تشخیص کامیاب علاج کی ضمانت ہے لیکن اکثر خواتین کو اس مرض سے مکمل آگاہی نہ ہونے کی وجہ سے ہلاکتوں کی شرح میں اضافہ ہوجاتا ہے۔ بریسٹ کینسر بھی کینسر کی دیگر اقسام کی طرح ایک بیماری ہی ہے لیکن معاشرے میں اس کے بارے میں بات کرنے کو شجر ممنوعہ ہی سمجھا جاتا ہے اور کئی خواتین شرم یا جھجھک کے باعث بیماری سے متعلق کسی کو نہیں بتاتیں، یہاں تک کہ یہ مرض آخری اسٹیج تک پہنچ جاتا ہے۔ اس ضرورت کو محسوس کرتے ہوئے خواتین کی صحت اور بالخصوص کینسر پر کام کرنے والے ’ دی پنک پاکستان‘ نے بریسٹ کینسر سے متعلق اپنی نوعیت کی ایک منفرد ایپلی کیشن متعارف کرائی ہے جو پاکستان کے طول و ارض میں رہنے والی خواتین کو نہ صرف مرض سے آگاہی بلکہ مفت علاج کی سہولت بھی فراہم کرتی ہے۔ اس حوالے سے پنک پاکستان کی صدر ڈاکٹر زبیدہ قاضی کا کہنا تھا کہ بریسٹ کینسر سے صحت یابی کے لیے سب سے اہم بات مرض کی بروقت تشخیص ہے اس لیے ہماری پہلی ترجیح مریضوں کو بنیادی معلومات فراہم کرنا اور ازخود معائنہ کرنے کے طریقہ کار سے آگاہ کرنا ہے۔ انٹرنیشنل ایجنسی فار ریسرچ آن کینسر کے مطابق پاکستان میں صرف گزشتہ برس 25 ہزار 928 خواتین میں بریسٹ کینسر کی تشخیص ہوئی جب کہ 13 ہزار 725 خواتین اس موذی مرض سے زندگی کی بازی ہار گئ یہ ایپ مقامی زبانوں میں دستیاب ہونے کی وجہ سے ہر طبقے سے تعلق رکھنے والی خواتین کے لیے مفید ہے اور سب سے خاص بات یہ کہ ایپ خواتین کو بریسٹ کینسر کی ازخود تشخیص یا طریقہ کار سے اگاہی دیتی ہے۔ ان سادہ اور آسان طریقوں سے خواتین اپنا معائنہ خود کرکے بریسٹ کینسر کی تشخیص کسی لیبارٹری یا اسپتال جائے بغیر گھر ہی پر کرسکتی ہیں۔ بریسٹ کینسر کی اولین علامات گٹھلیوں کا بننا ہے جس کی بروقت تشخیص کے لیے ایپ میں سادہ اور آسان طریقوں کو مقامی زبانوں میں پیش کیا گیا ہے جس دیکھ کر ازخود تشخیص کی جاسکتی ہے۔ بریسٹ کینسر کی تشخیص کے بعد اہم مرحلہ ماہر معالجین سے علاج کرانا ہے۔ ’پنک پاکستان‘ کے پاس قابل اور تجربہ کار بریسٹ اسپیشلسٹ موجود ہیں جن کی مفت خدمات صارفین کو پیش کی جائیں گی۔ اس ایپ میں صحت یاب مریضوں اور نئے مریضوں کے لیے ’’ڈسکشن فورم‘‘  بھی ہے جہاں صحت یاب مریض اپنے تجربے سے نئے مریضوں کو آگاہ کرتے ہیں جو نئے مریضوں کی حوصلہ افزائی اور مرض سے متعلق براہ راست معلومات کی فراہمی کا بہترین ذریعہ ہے۔ ایپ کی منفرد بات اس کا صوبائی زبانوں میں دستیاب ہونا ہے۔ پنجابی، سندھی، بلوچی اور پشتو زبان میں ہونے کی وجہ سے یہ پاکستان کے تمام علاقوں میں رہنے والی خواتین کے لیے یکساں طور پر کارآمد ہے۔ ایپ گوگل اسٹور سے انسٹال کی جاسکتی ہے یا نیچے دیئے گئے لنک پر کلک کرکے بھی انسٹال کی جاسکتی ہے۔

https://play.google.com/store/apps/details?id=com.pinkpakistan.pinkpakistan&hl=en&gl=US

Together we fight. Together we win. Together We Can Make A Difference. Pink Pakistan has launched Pink Pakistan App, the first mobile application in Pakistan, to promote and guide females for self-examination for early detection. The app also allows users to book an appointment with specialized doctors associated with Pink Pakistan.

اس خبر پر اپنی رائے کا اظہار کریں

اپنا تبصرہ بھیجیں